Ambasadori i Mbretërisë së Bashkuar në Kosovë, Nicholas Abott, ka reaguar pas sulmeve ndaj pjesëtarëve të KFOR-it dhe gazetarëve në veri të Kosovës.
Këto sulme ambasadori Abott i ka cilësuar të papranueshme dhe kriminale.
Me anë të një postimi në Facebook, Abott ka ripërsëritur thirrjen e shteteve të QUINT-it që të ndërmerren veprime të menjëhershme për të de-përshkallëzuar situatën dhe ulur tensionet.
“Sulmet ndaj personelit të KFOR-it dhe gazetarëve janë kriminale dhe të papranueshme. Siç e ka bërë jashtëzakonisht të qartë Quint – duhet të ndërmerren veprime menjëherë për të de-përshkallëzuar dhe ulur tensionet”, shkroi ai.
Ndryshe, përfaqësuesit e shteteve të Quint-it në Kosovë – SHBA-së, Mbretërisë së Bashkuar, Italisë, Gjermanisë dhe Francës – kërkuan nga kryeministri i Kosovës, Albin Kurti, që të ndërmarrë hapa që do të çonin në shtensionimin e situatës në veri të Kosovës.
Ambasadori i SHBA-së, Jeffrey Hovenier, i cili mori pjesë në takim, tha se “ka një marrëveshje se shtensionimi i situatës duhet të ndodhë, por nuk e di se si do të ndodhë”.
“Ne besojmë se nuk është e nevojshme që kryetarët e zgjedhur [të komunave në veri] të punojnë çdo ditë në ndërtesat komunale. Për një afat të shkurtër, ne rekomandojmë që kjo të mos bëhet”, tha Hovenier.
Sipas tij, Qeveria e Kosovës ka qenë në gjendje të gjejë mënyra që kryetarët të betohen në ndërtesa alternative dhe ta shmangin konfliktin.