Dy pasardhësit e familjes Jashari, Adem dhe Hamëz Jashari kanë vizituar veriun e Kosovës ku kanë kujtuar edhe dy policët e vrarë, Enver Zymberi dhe Afrim Bunjaku.
Hamëz Jashari ka shpërndarë disa fotografi në Facebook duke u shprehur se është mirënjohës ndaj historisë dhe heronjëve që kanë mbrojtur me gjak veriun.
“Nga Prekazi në Veri! Shetitje e lirë dhe krejt e zakonshme në veri të Kosovës bashkë me Ademin, duke qenë mirënjohës ndaj historisë dhe heronjëve që mbrojtën me gjak edhe këtë pjesë të veçantë të Kosovës. Policët Enver Zymberi dhe Afrim Bunjaku janë ata që kurorëzuan çlirimin e plotë të kësaj pjese të jashtëzakonshme të vendit”, ka shkruar ai.
Polici, Enver Zymberi ishte vrarë në korrik të vitit 2011 nga strukturat ilegale serbe. Njësia Speciale e Policisë së Kosovës në atë kohë kishte ndërmarrë aksionin për t’i futur nën kontroll pikat kufitare në veri të Kosovës në Jarinjë dhe Bërnjak.
Ndërkaq, rreshteri policor, Afrim Bunjaku u vra më 24 shtator të vitit 2023, nga grupe të armatosura serbe në fshatin Banjskë të Zveçanit.
Zymberi dhe Bunjaku janë shpallur si heronjë të Kosovës.