Sot është dita e fundit e afatit që Zyra e Rregullatorit të Energjisë u ka dhënë bizneseve të nënshkruajnë kontratë komerciale me një nga furnizuesit e licencuar nga ZRrE.
Të gjitha bizneset që nuk e kanë siguruar këtë kontratë, do mbesin pa energji elektrike.
Bazuar në një raportim të Dukagjinit ditë më parë, u bë e ditur se Oda Ekonomike planifikon t’i drejtohet Gjykatës Supreme për aktvendimin e shkallës së dytë të Gjykatës Komerciale që i dha të drejtë ZRrE-së.
Rrugët ligjore po i ndjek edhe i Dhoma e Tregtisë dhe Industrisë në Kosovë e cila po përgaditet t’i drejtohet Kushtetueses.
Në ndërkohë, sipas Odës Ekonomike, janë mbi 1000 biznese që nuk kanë arritur të bëhen pjesë e tregut të lirë të energjisë dhe rrjedhimisht, preken nga vendimi i ZRrE-së.
Vendimi i ZRRE-së për liberalizimin e tregut të energjisë ka hyrë në fuqi më 1 qershor 2025.
Sipas tij, të gjitha kompanitë me më shumë se 50 punëtorë ose me qarkullim mbi 10 milionë euro në vit janë të detyruara të kalojnë në tregun e hapur të energjisë. Për të mos mbetur pa energji gjatë kësaj periudhe tranzitore, bizneset u furnizuan përkohësisht nga Korporata Energjetike e Kosovës (KEK) si Furnizues i Mundësisë së Fundit.