Asociacioni i Gazetarëve të Kosovës (AGK) ka reaguar ashpër ndaj sjelljes dhe gjuhës së përdorur nga kryetari i Komunës së Prishtinës, Përparim Rama, ndaj gazetares së portalit “Reporteri”, Leonora Kolukaj.
Në një deklaratë për media, AGK-ja e cilësoi të papranueshme qasjen e kryetarit Rama, duke theksuar se gazetarja kishte tentuar të bëjë pyetje para një konference për media, por ishte përballur me sjellje të pahijshme nga ana e tij dhe stafit të tij.
“Rama dëgjohet duke e quajtur ‘loçkë’ gazetaren – një gjuhë me tone seksiste që ai e ka përdorur më parë ndaj gazetareve gra. Ndërkohë, gazetarja është shtyrë fizikisht nga ekipi i tij”, thuhet në reagimin e AGK-së.
Asociacioni thekson se e dënon fuqishëm këtë qasje dhe e fton kryetarin Rama të përgjigjet në pyetjet e interesit publik dhe të trajtojë gazetarët e mediat me profesionalizëm e respekt.