Asociacioni i Gazetarëve të Kosovës ka thënë se deputetë të Vetëvendosjes i kanë bërë presion publik një gazetareje të RTK-së, e cila të martën bashkë me gazetarët e tjerë bojkotoi konferencën e ministres së Industrisë, Rozeta Hajdari.
AGK-ja ka theksuar se bojkotin e konferencës e konsideron “si formë legjitime të protestës së gazetarëve dhe medieve, dhe fton partinë në pushtet të mos bëjë presion ndaj gazetarëve të mediumit publik”.
Ndërsa menaxhmentit të RTK-së i ka bërë thirrje që të mos ndikohet nga presionet e pushtetit.
“Deputeti Valon Ramadani ka shkruar se ‘si duket, ky institucion i qenka shmangur obligimit ligjor, duke mos qëndruar në konferencën e Ministres Rozeta Hajdari’. Në vijë të njëjtë ka shkruar edhe deputeti tjetër i Vetëvendosjes, Enver Dugolli, kurse të tjerë eksponentë të partisë në pushtet i kanë bërë jehonë këtyre qëndrimeve duke kërkuar largimin nga puna të gazetares”, thuhet në reagim.