Ali Berisha, kandidati i Aleancës për Ardhmërinë e Kosovës (AAK) për kryetar të Pejës, në një intervistë në Debat Plus në RTV Dukagjini, ka deklaruar se është e pafalshme që një qytet si Peja të mos ketë asnjë semafor, duke akuzuar kryetarin aktual Gazmend Muhaxheri për “fjalë shumë e mos punë”.
“Këto më tepër janë fjalë sesa punë, do të thotë e kundërta e asaj që thotë. I krahasojmë qytetet përreth me qytetin e Pejës dhe shihet qartë ndryshimi. Nëse krahasohet vetëm Gjakova me Pejën, me buxhete të përafërta e me numër të ngjashëm banorësh – ku është sot Gjakova e ku është Peja?” – ka pyetur Berisha.
Sipas tij, buxheti i Komunës së Pejës është shpërndarë në mënyrë të pabarabartë, duke u orientuar më tepër në zona periferike dhe në projekte të caktuara, shpesh në ambientet ku kanë pasur prona zyrtarë të komunës.
“Buxhetet e komunës së Pejës më tepër kanë shkuar në periferi, në projekte të caktuara, nëpër ambiente të caktuara, qoftë kah Rugova, ku kanë pas prona të caktuara zyrtarët e komunës…”, ka shtuar Berisha.
‘’Qyteti është mbet keq. Pjesa urbane është keq. Keni pa që nuk është zhvillu mjaftueshëm asnjë pjesë, asnjë lagje e qytetit…’’, është shprehur tutje.