Ministri i Infrastrukturës, Planifikimit Hapësinor dhe Mjedisit, Liburn Aliu, ka bërë të ditur tashmë janë duke u finalizuar sistemet e monitorimit për pesë digat ekzistuese në Ujman, Radoniq, Batllavë, Badovc dhe Përlepnicë, si dhe realizimin e pesë digave të reja në Firajë, Kamenicë, Kuqicë, Dragaqinë dhe Pollatë.
Në njoftimin e tij në Facebook, ministri Aliu ka informuar se janë kryer përgatitjet e nevojshme për të siguruar monitorimin e këtyre digave në aspektin gjeodezik, hidraulik, gjeologjik, sizmik dhe hidrometeorologjik.
Po ashtu, siç ka thënë ai, janë duke u vendosur sisteme automatike të alarmeve në disa prej këtyre digave për të parandaluar incidente të mundshme.
Gjithashtu, është planifikuar themelimi i Komitetit Shtetëror për Diga për menaxhimin e këtyre projekteve.
“Si Ministri e kemi prioritet që të kemi një model të duhur mjedisor, që të balacojmë ndikimet mjedisore dhe sociale duke marrë masa lehtësuese për rehabilitimin dhe mbrojtjen e habitateve, por edhe duke ruajtur zonat me vlera të larta konservuese”, ka shkruar ai.
Ministri Aliu gjithashtu ka theksuar rëndësinë e respektimit të aspekteve mjedisore dhe sociale në zhvillimin e këtyre projektet.
Sipas tij, synimi është të minimizohen ndikimet mjedisore dhe sociale, duke marrë masa për rehabilitimin dhe mbrojtjen e habitateve, si dhe ruajtjen e zonave me vlera të larta konservuese.