Kryetari i Preshevës, Shqiprim Arifi, ka thënë se Qeveria e Kosovës nuk duhet të rrezikojë raportet me Shtetet e Bashkuara të Amerikës (ShBA) duke thënë se “me Amerikë s’ka lojë”.
Përmes një postimi në Facebook, Arifi ka thënë se është e rëndësishme dhe jetike që të jetë një Republikë e Kosovës e cila ka një sovranitet të shtrirë në gjithë territorin e saj, por sipas tij, kjo arrihet vetëm me sinkronizim dhe koordinim me aleatët dhe miqtë ndërkombëtarë, sidomos me ShBA-në.
“Është e rëndësishme dhe jetike që të kemi një Republikë të Kosovës e cila ka një sovranitet të shtrirë në gjithë territorin e saj, por kjo arrihet vetëm me sinkronizim dhe koordinim me aleatët dhe miqtë tanë ndërkombëtarë, sidomos me Shtetet e Bashkuara të Amerikës”, ka shkruar Arifi.
Reagimi i tij vjen pasi një ditë më parë ShBA-ja njoftoi se ka vendosur ta sanksionojë Kosovën pas vendimit të Qeverisë për t’i vendosur kryetarët e komunave në veri në ndërtesat komunale, gjë e cila shkaktoi tensione në veri.
Vendimi i parë ishte për ta përjashtuar Kosovën nga stërvitja e madhe ushtarake “Defender Europe 2023″.