Dy persona janë arrestuar dhe janë konfiskuar një sasi e armëve dhe municionit, në Komunën e Podujevës.
Në këtë operacion policor kanë marrë pjesë edhe Njësia Speciale Operative dhe K9 (Njësia me qen).
Gjatë këtij aksioni janë sekuestruar tri armë, disa pjesë të armëve dhe mbi 200 fishekë të kalibrave të ndryshëm.
“Gjatë këtij operacioni policor, janë sekuestruar këto prova materiale: tri armë (dy AK47, një revole), 219 fishekë kalibra të ndryshëm dhe pjesë për armë të kalibrave të ndryshëm, një maskë, dy telefona mobilë”, thuhet në njoftimin e policisë.
Ndaj dy të dyshuarve është iniciuar rasti për përfshirje në dy vepra penale.
“Ndaj të dyshuarve iniciohet rasti, nën dyshimin e përfshirjes në dy vepra penale: ‘Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse’ dhe ‘Mbajtja në pronësi, kontroll ose posedim të paautorizuar të armëve”, thuhet në njoftim.
Pas intervistimit të dy të dyshuarve, me aktvendim të prokurorit dy të dyshuarit janë dërguar në mbajtje për 48 orë.