Dy persona janë arrestuar nën dyshimin për kryerjen e veprave penale për “fajde” dhe “detyrim”, të martën në Fushë-Kosovë.
Me anë të një komunikate, Policia e Kosovës ka njoftuar se gjatë operacionit policor të Drejtorisë për Hetimin e Krimit të Organizuar, janë gjetur dëshmi materiale si armë dhe para.
“Sot me datë 13.06.2023 me Urdhëresë të Gjykatës Themelore në Prishtine – Departamenti i Krimeve të Rënda, Policia e Kosovës, konkretisht Drejtoria për Hetimin e Krimit të Organizuar në bashkëpunim me Prokurorinë Themelore, ka zhvilluar operacionin policor në dy lokacione në Fushë-Kosovë, ku janë arrestuar dy persona të dyshuar lidhur me dyshimin për kryerjen e veprave penale ‘Fajde’ edhe ‘Detyrim’. Gjatë operacionit policor si prova/dëshmi janë sekuestruar: Katër mijë (4000) euro, tri (3) revole, një (1) armë e gjatë, katër (4) karikatorë, njëqind e pesëdhjetë (150) fishekë, një (1) automjet, tre (3) telefona mobilë, shënime/evidenca që dyshohen se lidhen me veprat penale”, thuhet në njoftim.
Krahas kësaj, bëhet e ditur se personat e dyshuar janë dërguar në ndalim për 48 orë.