Një 32-vjeçar është arrestuar nga policia në qytetin Castrop-Rauxel të North Rhine-Westphalia, pasi dyshohet se kishte përgatitur një “sulm terrorist”.
Kështu është bërë e ditur nga policia dhe prokurorët gjermanë, në një deklaratë të përbashkët, shkruan DW.
Burri, i identifikuar si një iranian, “dyshohej se kishte përgatitur një akt të rëndë dhune që rrezikon shtetin me përdorimin e planifikuar të lëndës së rrezikshme cianid dhe ricinë për të kryer një sulm të motivuar nga islamizmi”.
Ricina është një armë biologjike shumë toksike.
Arrestimi dhe bastisjet nga njësitë speciale janë kryer gjatë natës së kaluar dhe këtë të diel në mëngjes.
Sipas policisë, i dyshuari është dërguar në paraburgim së bashku me një person tjetër.
Nuk dihet se sa kanë përparuar planet e sulmit ose nëse një objektiv specifik tashmë është identifikuar.
Stafi i Institutit Robert Koch (RKI) ishte gjithashtu në vend si konsulentë për shkak të rreziqeve biologjike dhe kimike.
Sipas RKI-së, ricina shumë toksike është renditur si armë lufte nën seksionin “armë biologjike”.
Një zonë rreth vendbanimit të të dyshuarit u rrethua, ndërsa policia dhe punëtorët e shërbimeve të shpëtimit ishin në vendin e ngjarjes.
Agjencia e lajmeve Deutsche Presse-Agentur (dpa) raportoi se shumë punonjës të urgjencës mbanin kostume mbrojtëse ndërsa ishin vendosur atje, për shkak të rrezikut nga lëndët toksike.
Hetuesit deklaruan se “kërkimi shërben për të gjetur toksina përkatëse dhe prova të tjera”.
Ata bënë të ditur se gjatë operacionit është arrestuar edhe një person tjetër, i cili është dërguar në mbajtje.
Ende nuk është vendosur nëse 32-vjeçari do të çohet para gjykatës dhe do të mbahet nën arrest.