Prokuroria Speciale e Kosovës, në bashkëpunim me Policinë e Kosovës, ka bërë të ditur se ka arrestuar një person me inicialet D.N., nën dyshimin për kryerjen e veprës penale “Krim lufte kundër popullsisë civile”.
Sipas komunikatës, arrestimi është kryer në pikëkalimin kufitar Dheu i Bardhë, në kufi me Serbinë, nga hetuesit e Drejtorisë për Hetimin e Krimeve të Luftës.
D.N. dyshohet se gjatë luftës së Kosovës, në periudhën 13 – 30 prill 1999, në bashkëkryerje me pjesëtarë të forcave policore dhe ushtarake serbe, ka marrë pjesë në vrasjen e 25 civilëve shqiptarë në Komunën e Gjilanit.
Brenda afatit të paraparë ligjor, Prokuroria Speciale do të paraqesë kërkesën për caktimin e masës së paraburgimit në Gjykatën Themelore në Prishtinë, Departamenti Special.