Qeveria e Austrisë, të enjten e dy shkurtit, ka urdhëruar që katër diplomatë me bazë në Vjenë, përfshirë dy në misionin e Moskës në agjencitë e OKB-së në qytet, të largohen nga vendi.
Kështu ka bërë të ditur agjencia “Associated Press”, teksa ka theksuar se diplomatëve u është dhënë një javë kohë që të largohen nga Austria.
Ministria e Jashtme, në një deklaratë të shkurtër, ka thënë se dy diplomatë në Ambasadën Ruse ishin “angazhuar në akte të papajtueshme me statusin e tyre diplomatik” dhe dy në misionin e përhershëm në Kombet e Bashkuara në Vjenë “kanë kryer akte të papajtueshme me Marrëveshjen e Selisë”.
Vendet e Evropës Perëndimore dhe Rusia kanë dëbuar diplomatët e njëri-tjetrit, në disa raste, që nga fillimi i pushtimit të plotë të Ukrainës nga Moska gati një vit më parë.
Austria, një anëtare e Bashkimit Evropian, e cila ka një politikë të neutralitetit ushtarak, i ka dhënë ndihmë Ukrainës, por jo pajisje ushtarake.
Presidenti Aleksander Van der Bellen ishte në Kiev të mërkurën, në një udhëtim që synonte ta nënvizonte solidaritetin e Austrisë.
Vjena është shtëpia e agjencive të KB, duke përfshirë Agjencinë Ndërkombëtare të Energjisë Atomike dhe Zyrën e OKB-së për Drogën dhe Krimin.