Avokati Emrush Kastrati ka deklaruar se sulmet ndërmjet institucioneve të pavarura nuk janë të përshtatshme dhe as të dobishme, as për opinionin publik dhe as për besueshmërinë e tij ndaj punës që këto institucione kryejnë.
Në një intervistë në emisionin FIVE në RTV Dukagjini, ai ka ngritur shqetësimin se këto përplasje mund të kenë ndikuar edhe në mosdekretimin e kryeprokurorit të shtetit.
“A është një ndër këto arsye mosdekretimi i z. Isufaj dhe lënia e Kryeprokurorisë së Shtetit pa kryeprokuror? Së paku në bazë të deklaratave që deri më tani janë dhënë në publik, rezulton se mund të jenë edhe këto si indicie”, tha Kastrati.
Avokati gjithashtu theksoi se çdo qytetar i Kosovës, pa përjashtim, duhet t’u përgjigjet ftesave të prokurorisë, përfshirë edhe presidentin e vendit.
Ai e tha këtë në kontekst të mosparaqitjes së kryeministrit Albin Kurti në Prokurori për të dhënë dëshmi si dëshmitar.
Lidhur me akuzat për hetime të njëanshme, Kastrati tha se kjo është një çështje e brendshme e Prokurorisë, e cila duhet të menaxhohet në mënyrë profesionale dhe të paanshme.
“Nëse dikush ka dyshime në këtë drejtim – se ka seleksionime të lëndëve për hetim, se prolongon një hetim të një personaliteti më të hershëm dhe vazhdon me një tjetër, ajo është çështje që duhet të hetohet nga zyra e prokurorit disiplinor në aspektin e brendshëm. Në këtë drejtim, zyra e prokurorit disiplinor duhet të jetë aktive për të parë nëse ka anshmëri në hetime apo seleksionime të hetimeve”, deklaroi Kastrati.