Deputetja nga radhët e Lidhjes Demokratike të Kosovës, Hykmete Bajrami, ka thënë se nëse në Kuvend kalon projektligji për shërbimin civil të Kosovës, atëherë ky grup parlamentar nuk do ta votojë atë.
Po ashtu, ajo paralajmëroi se ai do të përfundojë në Gjykatën Kushtetuese.
“Edhe një Ligj antikushtetues sot në rend të ditës. Sot, si pikë e 5-të e rendit të ditës është shqyrtimi i dytë i Projektligjit nr. 08/L-180 për plotësimin dhe ndryshimin e Ligjit nr.06/L-048 për Këshillin e Pavarur Mbikëqyrës për Shërbimin Civil të Kosovës. Grupi ynë parlamentar ka qenë kundër këtij Ligji antikushtetues edhe në lexim të parë, ku kemi shprehë shqetësimet dhe argumentet tona kundër, për më tepër “Instituti i Kosovës për Drejtësi” ka analizuar këtë projektligj dhe sot raportin e ka ndarë me të gjithë deputetët e Kuvendit të Republikës së Kosovës, në këtë raport ndër të tjera thuhet:
“Në atë projektligj nuk ka asnjë dispozitë të vetme e cila nuk bie në kundërshtim me Kushtetutën e Kosovës dhe aktgjykimet e Gjykatës Kushtetuese. Në këtë projektligj nuk ka asnjë dispozitë që ia vlen të miratohet nga Kuvendi i Kosovës. Për këtë arsye me qëllim të mbrojtjes së Kushtetutës së Kosovës dhe mbrojtjes së institucionit kryesor që mbron rregullat e shërbimit civil, Kuvendi i Kosovës duhet ta refuzojë këtë ligj”, shkroi ajo.