Aida Ferati-Doli, Këshilltarja komunale, për bashkimin e Mitrovicës së Veriut në Asociacionin e Komunave të Kosovës (AKK), në “FIVE” ka thënë se fillimisht kjo komunë ka shprehur dëshirën t’i bashkohet AKK-së.
“Ka qenë kërkesë e komunës, rrjedhimisht e kryetarit, çfarë kemi bërë ne sot në Kuvendin Komunal është se kemi votuar pro këtij bashkimi”, ka thënë Ferati-Doli.
Ferati-Doli ka thënë tutje se ky veprim është legjitim.
Këshilltarja komunale ka shtuar se bashkimi i Mitrovicës së Veriut në Asociacionin e Komunave të Kosovës nuk do të ndikojë në situatën e krijuar në këtë pjesë të vendit.
“Secila komunë ka të drejtë t’i bashkohet këtij asociacioni, Mitrovica e Veriut ka shprehur dëshirën dhe ne me një vednim në Kuvendin Komunal e kemi bërë këtë gjë”, ka shtuar tutje ajo.
Gjatë kësaj të premteje është votuar pro bashkimit të Komunës Veriore të Mitrovicës në Asociacionin e Komunave të Kosovës, ka bërë të ditur Këshilltarja komunale, Aida Doli.
Me anë të një postimi në Facebook, Doli e ka cilësuar këtë votim si një tregues bashkëpunimi e përforcimi të qeverisjes lokale.
“Sot, në Kuvendin Komunal, në Veriun e Mitrovicës, u votua pro bashkimit të Komunës Veriore të Mitrovicës në Asociacionin e Komunave të Kosovës. Kjo votë tregon përkushtimin dhe mbështetjen për bashkëpunimin e fortë dhe përforcimin e qeverisjes lokale. Bashkëpunimi dhe bashkërendimi i komunave janë thelbësore për t’i adresuar sfidat dhe për të ndërtuar një shoqëri më të bashkuar dhe më të qëndrueshme për të gjithë”, ka shkruar ajo.