Ish-zëvendësministri i Punëve të Jashtme të Kosovës, Anton Berisha, ka thënë se kryeministri i Kosovës, Albin Kurti vazhdon të qeverisë Kosovën, siç thotë ai pa program dhe pa projekte reale.
Të premten, përmes një postimi në Facebook, Berisha ka shkruar se në virtualitetin e qeverisjes së tij, në Kosovë është arritur përsosmëria.
Sipas tij, pasi është arritur përsosmëria, tashmë ai mund të bëjë shëtitje trijavore nëpër kontinente për ngritjen e nivelit të dijes dhe eksplorimit teknologjik.
“Meqenëse në virtualitetin e qeverisjes së tij, në Kosovë është arritur përsomëria, tash ai mund të bëjë shëtitje trijavore nëpër kontinente për ngritjen e nivelit të dijes dhe eksplorimit teknologjik, si dhe të mbajë ligjërime se si duhet të rregullohet bota”, ka thënë Berisha.
Ndërsa sipas tij, Kurti vazhdon ta qeverisë Kosovën pa program dhe pa projekte reale.
Sipas Berishës, kjo zhvendosje e tij, në botën reale e lë Kosovën pa kryeministër, përderisa Albinit i mundësohet plotësimi i dëshirave personale përmes arsyetimeve imagjinare.
Postimin e tij, ai e ka përmbyllur duke thënë “E pse jo, kur të gjitha i ka falas”.
Ndryshe, Kurti e ka filluar vizitën zyrtare në Shtetet e Bashkuara të Amerikës (ShBA) më gjashtë maj, ndërsa më pas ka udhëtuar drejt Zvicrës ku ka marrë pjesë në Forumin Ekonomik Botëror në Davos.
Pas vizitës së tij afro trijavore jashtë vendit, Kurti sot do të jetë në Kosovë, ku do të marrë pjesë në Forumin e Bizneseve të Diasporës në Prishtinë.