Ish-kryeministri i Shqipërisë, Sali Berisha, ka akuzuar drejtpërdrejt kryeministrin Edi Rama, duke thënë se është ai i cili e çoi ish-presidentin e Kosovës, Hashim Thaçin në arrestim.
“Ky e futi Thaçin, ky i sugjeroi të shtrëngonte duart me Putinin. Ky bashkë me kolosët e tij janë burime shpifjesh të pafundme. Edi Rama pra, futi udhëheqjen politike të Kosovës në një spirale e cila ndikoi në procesin e arrestimit të tyre. Unë do diskutoj më vonë për të gjithë të vërtetat e hetimeve”, deklaroi Berisha, gjatë fjalimit të tij para deputetëve.
Ndërkaq, Berisha ka përmendur gazetarin shqiptar nga Kosova, Baton Haxhiun, duke thënë se do të bëhet patriot me Ramën, pasi sipas tij, këta dy të fundit i dërguan në arrestim udhëheqësit politikë nga Kosova.
“Ky që do të bëhet tani patriot, me Baton Haxhiun janë dy promotot të arrestimit të udhëheqjes politike në Kosovë. Del një vasal i Aleksandër Vuçiqit se e di që është i damkosur për planet e Vuçiqit. Këto janë njëri aspekt. Aspekti tjetër është 7 korriku. Qëndrimi ynë është padiktueshëm ai që ka qenë gjithmonë. Unë do ta shpreh në OKB”, u shpreh Berisha, raporton TopChannel, transmeton Dukagjini.
Më tej, ish-kryeministri vijoi duke thënë se Rama e ka futur Thaçin në “spiralen e ndryshimit të kufijve të Kosovës”.
Me këtë hipotezë ai pretendon se kreu i Qeverisë bëri që Thaçi të shtrëngojë duart me Vladimir Putin dhe më pas, kjo gjë e çoi atë në arrestim pas ngritjes së Gjykatës Speciale dhe raportit të Dick Martyt.
Situata u tensionua pasi kryetarja e Kuvendit, Lindita Nikolla nuk ia dha fjalën Berishës, e ky i fundit iu drejtua Ramës me fjalë fyese duke i thënë, “O burracak, o i pafytyrë”.
Ndërsa, Rama ia rikujtoi atij se është person non-grata për ShBA-në, duke i thënë se dinjiteti i shqiptarëve nuk do të përdhoset nga një person i padëshiruar me certifikatë të vulosur nga SHBA-të.
Rama akuzon PD-në: Ju jeni thika në shpinën e Kosovës, i keni hapur rrugën raportit të Dick Marty-t