Presidenti i Shteteve të Bashkuara të Amerikës, Joe Biden, ka përkujtuar viktimat e sulmit terrorist të 11 shtatorit të vitit 2001.
Në një postim në llogarinë e tij në Twitter, presidenti amerikan ka thënë se ende është e freskët ngjarja e ndodhur 21 vjet më parë.
Biden ka theksuar se amerikanët ende i kujtojnë jetët e çmuara që u vodhën në këtë sulm.
“Sot, ne ndajmë këtë rit solemn të kujtimit dhe reflektojmë për gjithçka që humbi në zjarrin dhe hirin më 11 shtator 2001. Për njëzet e një vjet, ne ende mbajmë premtimin tonë për të mos harruar kurrë dhe do të mbajmë kujtimin e atyre jetëve të çmuara të vjedhura nga ne”, ka shkruar ai.
Today, we share this solemn rite of remembrance and reflect on all that was lost in the fire and ash on September 11, 2001. For twenty-one years, we still kept our promise to never forget, and we will keep the memory of those precious lives stolen from us.
— Joe Biden (@JoeBiden) September 11, 2022
Të dielën e 11 shtatorit janë shënuar 21 vjet nga sulmi i 19 individëve, përkatësisht, 15 nga Arabia Saudite, dy nga Emiratet e Bashkuara Arabe, një nga Egjipti dhe një nga Libani.
Katër aeroplanë kryen sulme duke goditur Kullat Binjake në Nju Jork, Pentagonin në Uashington dhe një avion u rrëzua në Pensilvani.
Nga ky sulm mbetën të vdekur afër tre mijë persona.
Aeroplani i parë goditi Kullën Veriore në orën 08:46 të mëngjesit sipas kohës lokale, ndërsa aeroplani i dytë goditi Kullën Jugore në 09:03 të mëngjesit sipas kohës lokale.
Në më pak se dy orë, të dy kullat 110-katëshe u shembën në një re të madhe tymi.
Në orën 09:37, një aeroplan i tretë shkatërroi krahun perëndimor të Pentagonit – selinë e madhe të ushtrisë amerikane pranë Uashingtonit.
Një aeroplan i katërt u rrëzua në një fushë në Pensilvani në orën 10:03 të mëngjesit pasi pasagjerët rezistuan.
Mijëra njerëz u plagosën ose u zhvilluan më vonë sëmundje të lidhura me sulmet, duke përfshirë zjarrfikësit që punonin në rrënoja.
Sulmet ishin planifikuar nga Afganistani nga rrjeti ekstremist islamik Al Kaida, lideri i së cilës Osama Bin Laden u vra nga trupat amerikane në Pakistanin fqinj, në vitin 2011.