Sekuestrimi i mbi gjysmë toni marihuanë në Suharekë, me vlerë rreth 750 mijë euro, ka ngritur dilema nëse Kosova po shndërrohet në vend prodhues të narkotikëve.
Safet Blakaj, drejtor i Qendrës “Labyrinth”, tha në emisionin FIVE se në tri-katër vitet e fundit raportet ndërkombëtare e kanë përfshirë Kosovën si vend prodhues, edhe pse më herët kjo nuk ka mundur të argumentohej.
“Janë tri katër vitet e fundit që në raportet ndërkombëtare cilësohet si e tillë. Edhe pse ka pasur tentime edhe në të kaluarën që Kosova të shënohet si vend kultivues ose prodhues, raportet ndërkombëtare nuk kanë mundur ta argumentojnë deri më tani. E mira është që ne tentojmë që t’i shmangim vend prodhues edhe vend punuesit. Por, mund të themi që aktiviteti i organeve të sigurisë po ndërmerr aksione dhe kjo na pëlqen që përpjekjet janë ta parandalojnë kultivimin e drogës”, u shpreh Blakaj.
Ai theksoi se presioni i madh po vjen nga Shqipëria, ku grupet kriminale po goditen fort nga policia. Si pasojë, sipas tij, aktiviteti i kultivimit të kanabisit po zhvendoset në vendet fqinje.
“Presioni po vie nga Shqipëria, kjo domethënë që në Shqipëri po sulmohen grupet kriminale thellësisht në kuptimin e kultivimit të kanabisit dhe kjo ka filluar të bartet në vendet tjera. Para një muaji e gjysmë janë zënë diku 600 bimë narkotike në Kosovë, brenda dy ditëve ka pasur 13 mijë fije kanabis në Mal të Zi dhe jo larg prej Kosovës, në Serbinë e Jugut janë zënë po ashtu një sasi e madhe – 900 fije kanabisi. Këto nuk kanë ndodhur në të kaluarën, por si duket kërkesa dhe ofertat e mëdha e bëjnë këtë”, tha ai.
Sipas Blakajt, ndërsa më herët droga vinte kryesisht nga Shqipëria e gatshme për treg, tash kërkesa e madhe po bën që kultivimi të tentojë të bartet edhe në Kosovë dhe rajon.