Policia e Kosovës ka njoftuar se për shkak të ndeshjes së futbollit, e cila do të zhvillohet të hënën në stadiumin “Fadil Vokrri”, në Prishtinë, kanë bërë të gjitha përgatitjet e duhura për të ofruar siguri për të gjithë pjesëmarrësit, si dhe ka ndërmarrë masat e nevojshme për të përcaktuar lirimet, kufizimet, bllokimet e plota apo të pjesshme të segmenteve të caktuara rrugore në kryeqytet.
Policia e Kosovës për të evituar bllokadat në rrugë, kolonat e gjata të automjeteve, për të mundësuar një qarkullim në suaza të normales, do të veprojë në të gjitha rrugët, të cilat lidhen me stadiumin “Fadil Vokrri”, duke formuar pikat e kontrollit me qëllim të ndalimit dhe udhëzimit të automjeteve, si dhe vendosjen e rregullit përgjatë atyre rrugëve.
Në këtë kontekst, policia do të ndërpresë qarkullimin e të gjitha automjeteve në rrugët “Enver Zymberi” dhe “Rinia”.
“Plani në fjalë do të fillojë të implementohet më 05.06.2023, që nga ora 07:00 deri në përfundim të ndeshjes”, thuhet në njoftimin e Policisë.
Andaj për të përballuar sa më lehtë rrethanat që do të paraqiten në qarkullimin rrugor, Policia e Kosovës u ka bërë thirrje qytetarëve të kryeqytetit që t’i shmangin lëvizjet e tyre drejt stadiumit të qytetit me vetura.
Në finalen e Kupës së Kosovës, Prishtina dhe Gjilani do të ballafaqohen në stadiumin “Fadil Vokrri” duke filluar nga ora 18:00.
Është pritur që kjo të jetë një ndeshje e emocionuar, e cila do të marrë vëmendjen e shumë tifozëve të futbollit në Kosovë.
Do të jetë një moment i madh për futbollin kosovar dhe një mundësi për ekipin fitues të sigurojë një trofe të rëndësishëm në historinë e tyre.