Britania e Madhe ka bërë thirrje të qartë ndaj shteteve anëtare të Kombeve të Bashkuara që ende nuk e kanë njohur pavarësinë e Kosovës, duke theksuar se njohja është “esenciale për stabilitetin afatgjatë në rajon dhe për zhbllokimin e potencialit të plotë të vendit”.
Përfaqësuesja britanike në Këshillin e Sigurimit të OKB-së deklaroi se Mbretëria e Bashkuar mbetet mbështetëse e palëkundur e zhvillimit demokratik dhe euroatlantik të Kosovës, duke nënvizuar rëndësinë e forcimit të institucioneve shtetërore dhe sundimit të ligjit.
“Si ndër vendet e para që e kanë njohur pavarësinë e Kosovës, u bëjmë thirrje shteteve anëtare që ende nuk e kanë bërë këtë, t’i bashkohen shumicës. Njohja është esenciale për stabilitet afatgjatë dhe për zhbllokimin e potencialit të plotë të Kosovës”, tha ajo gjatë seancës së Këshillit të Sigurimit ku u diskutua raporti i Sekretarit të Përgjithshëm të OKB-së, Antonio Guterres.
Në fjalën e saj, përfaqësuesja britanike inkurajoi progres të shpejtë drejt formimit të qeverisë në Kosovë, duke përgëzuar “mbajtjen e qetë dhe demokratike” të procesit zgjedhor lokal. Ajo, megjithatë, shprehu shqetësim për disa deklarata politike të fundit që, sipas saj, “rrezikojnë të rrënojnë institucionet shtetërore, përfshirë Gjykatën Kushtetuese”.
“Institucionet e forta dhe gjithëpërfshirëse janë jetike për të avancuar integrimin ndërkombëtar të Kosovës dhe për të ofruar progres për qytetarët e saj”, theksoi diplomatja britanike, duke e cilësuar kthimin e kryetarëve serbë në komunat me shumicë serbe si “një hap pozitiv drejt një pushteti lokal përfaqësues”.
Ajo kërkoi që tranzicioni institucional në komunat ku kanë fituar kandidatët e Listës Serbe të zhvillohet me “respektim të plotë të sundimit të ligjit dhe me mundësi reale për riintegrimin e komunitetit serb”.
Në lidhje me sulmin terrorist në Banjskë, përfaqësuesja britanike kërkoi nga Serbia që të bashkëpunojë plotësisht me institucionet ndërkombëtare dhe të sigurojë dorëzimin e Milan Radojçiqit, të cilin e cilësoi si pjesë kyçe të përgjegjësisë për ngjarjet e shtatorit 2023.
“Llogaridhënia për sulmin në Banjskë dhe për sulmet ndaj KFOR-it është pritur shumë gjatë. Serbia duhet të sigurojë përgjegjësinë penale të autorëve dhe të kontribuojë në tkurrjen e tensioneve”, theksoi ajo.
Britania gjithashtu ritheksoi rëndësinë e zbatimit të plotë të marrëveshjeve ekzistuese në kuadër të dialogut Kosovë–Serbi, përfshirë themelimin e Asociacionit të Komunave me Shumicë Serbe, që u cilësua si “element thelbësor për ndërtimin e besimit dhe sigurimin e stabilitetit afatgjatë”.
Në fund, përfaqësuesja britanike mirëpriti angazhimin konstruktiv të Kosovës në procesin e Berlinit dhe bëri thirrje për përdorim më efikas të resurseve të Kombeve të Bashkuara.
Deklaratat e Britanisë u përkrahën edhe nga përfaqësuesi i Francës, Jay Dharmadhikari, i cili kërkoi që kryesit e sulmit në Banjskë të sillen para drejtësisë, duke theksuar se “është e papranueshme që ata të mbesin të lirë më shumë se dy vjet pas ngjarjeve”.