Kryeministrja e Serbisë, Ana Brnabiq, pas takimit me ambasadorët e vendeve anëtare të Bashkimit Evropian, ka njoftuar se ajo së bashku me diplomatët evropian kanë biseduar për tri tema themelore.
“Për dialogun ndërmjet Kosovës dhe Serbisë. Për përafrimin e politikës së jashtme të Serbisë me atë të BE-së, dhe për reformat, në shtetin e së drejtës”, ka deklaruar ajo.
BE-ja konfirmon se së pari duhet të zbatohet marrëveshja për të cilën tashmë është rënë dakord.
Kryeministrja serbe ka pretenduar se në takimin e së premtes së 25 nëntorit është pajtuar me diplomatët e shteteve evropiane.
“Se para çdo marrëveshjeje të re ndërmjet Kosovës dhe Serbisë është e nevojshme të zbatohen marrëveshjet ekzistuese, përkatësisht Marrëveshja e Brukselit e nënshkruar në vitin 2013 dhe formimi i Asociacionit të Komunave me shumicë serbe”, ka theksuar Brnabiq, gjatë një konference të përbashkët për shtyp me shefin e delegacionit të BE-së në Serbi, Emanuel Giofre.
Rekomandimet e PE-ës janë kontradiktore në aspektin parimor, sipas Brnabiqit.
Ajo tha se BE po kërkon vendosjen e sanksioneve nga Serbia ndaj Rusisë, pasi kjo e fundit ka shkelur sovranitetin e një shteti të pavarur siç është Ukraina edhe të njëjtën kohë i kërkon Serbisë që ta njoh Kosovën.
“Më mirë të kemi bisedime për një mijë vjet, sesa konflikt për një ditë. Paqja është gjëja më e rëndësishme dhe ne do të vazhdojmë të avokojmë për dialog, bisedime, për të ruajtur paqen dhe stabilitetin”, ka shtuar kryeministrja Brnabiq.
Ajo ka përfunduar duke thënë se Serbia mbetet e përkushtuar në rrugën e saj drejtë integrimit në Bashkimin Evropian pasi sipas saj anëtarësimi në BE është në interes të qytetarëve të Serbisë edhe ekonomisë serbe, raporton Tanjug, transmeton Portali Dukagjini.