Këshilli i Evropës, institucioni kryesor i të drejtave të njeriut në kontinent, njoftoi të mërkurën se ka vendosur t’i heqë imunitetin diplomatik ish-sekretarit të përgjithshëm norvegjez, Thorbjørn Jagland, duke i hapur rrugë hetimeve policore mbi lidhjet e tij me Jeffrey Epstein.
Policia norvegjeze për krimet ekonomike ka nisur një hetim ndaj Jagland, ish-kryeministër dhe ish-ministër i Jashtëm i Norvegjisë, si dhe ish-kryetar i Komitetit të Çmimit Nobel për Paqen, nën dyshimin për korrupsion.
Vendimi për hetimin e Jagland, i cili drejtoi Këshillin e Evropës nga viti 2009 deri në vitin 2019, u bazua në informacione të zbuluara nga dokumente të reja të publikuara në SHBA lidhur me Epstein, financieri amerikan i dënuar për krime seksuale, i cili vdiq në burg në vitin 2019.
Avokati i Jagland, Anders Brosveet, deklaroi se heqja e imunitetit ishte e pritshme dhe se klienti i tij do të bashkëpunojë me hetimin për të sqaruar çdo çështje, shkruan Reuters, transmeton Dukagjini.
“Ai e merr këtë çështje shumë seriozisht, por thekson se beson se nuk ekzistojnë rrethana që përbëjnë përgjegjësi penale”, thuhet në deklaratën e avokatit.
Sipas autoriteteve, për të zhvilluar hetimin ishte e nevojshme heqja e imunitetit. Ministria e Jashtme e Norvegjisë i kërkoi Komitetit të Ministrave të Këshillit të Evropës, ku bëjnë pjesë 46 shtete, të miratonte këtë masë.
Jagland nuk është akuzuar për ndonjë vepër penale, por hetimi do të shqyrtojë nëse ai ka marrë dhurata, udhëtime apo hua në lidhje me pozicionin e tij zyrtar. Në një letër të datës 8 shkurt, policia norvegjeze theksonte se Jagland, si sekretar i përgjithshëm i zgjedhur, do të kishte shkelur besimin e veçantë që lidhet me postin nëse do të kishte pranuar ryshfet.
Dokumentet e reja të publikuara në SHBA kanë nxjerrë në pah lidhje të shumta të Epstein me politikanë, figura mbretërore dhe persona me ndikim në Evropë dhe SHBA.
Sipas këtyre dokumenteve, në vitin 2014 Jagland dhe asistentët e Epstein kishin bërë plane të detajuara për një vizitë të mundshme të Jagland, bashkëshortes së tij, dy fëmijëve dhe të dashurës së djalit të tij në Palm Beach dhe në ishullin privat të Epstein në Karaibe. Jagland ka mohuar se ka vizituar ndonjëherë ishullin privat të Epstein.
Në një email të vitit 2014, ai i kishte kërkuar Epstein ndihmë për financimin e një apartamenti në Oslo. Ndërsa në email-e të vitit 2018, Epstein i kërkonte Jagland të ndërmjetësonte një takim me ministrin e Jashtëm rus, Sergei Lavrov, duke pretenduar se kishte informacione për t’i ofruar presidentit Vladimir Putin. Jagland ishte zotuar se do ta diskutonte çështjen me ndihmësin e Lavrovit.
Policia norvegjeze bëri të ditur se po heton gjithashtu dy diplomatë të njohur në një çështje tjetër korrupsioni të lidhur me Epstein. Ndërkohë, princesha e kurorës së Norvegjisë ka kërkuar disa herë falje për miqësinë e saj me financierin e diskredituar.
Komisioni parlamentar i mbikëqyrjes në Norvegji vendosi unanimisht të martën të ngrejë një hetim të jashtëm të rrallë mbi lidhjet e Ministrisë së Jashtme me Epstein.