Këshilltari i lartë i Departamentit amerikan të Shtetit, Derek Chollet dhe i dërguari special i Shteteve të Bashkuara të Amerikës (ShBA) për Ballkanin Perëndimor, Gabriel Escobar, të enjten e 18 majit do të dalin para senatit.
Komisioni i Senatit për Marrëdhëniet me Jashtë do të zhvillojë seancën dëgjimore të quajtur “Vlerësimi i politikës së ShBA-së për Ballkanin Perëndimor”.
Kjo seancë pritet të fillojë në orën 10:30.
Një ditë para mbajtjes së kësaj seance dëgjimore, këshilltari amerikan, Chollet, ka thënë se është e nevojshme që të shmangen provokimet dhe konfliktet në mes të Kosovës dhe Serbisë.
Ai këto deklarata i ka bërë gjatë një bisede telefonike që ka zhvilluar me presidentin e Serbisë, Aleksandër Vuçiq.
Kosova dhe Serbia zhvillojnë dialog që nga viti 2011, proces që synon normalizimin e plotë të raporteve.
Në shkurt, në Bruksel palët arritën Marrëveshjen bazë drejt normalizimit të raporteve, ndërkaq një muaj më vonë në Ohër, arritën Aneksin për zbatimin e kësaj marrëveshjeje.
Marrëveshja, e përbërë nga 11 nene, nuk e obligon Serbinë që ta njohë Kosovën, por kërkon nga të dyja vendet që t’i pranojnë dokumentet dhe simbolet e njëra-tjetrës, përfshirë: pasaportat, diplomat dhe targat.
Ajo kërkon, po ashtu, nga palët që t’i zbatojnë të gjitha marrëveshjet e arritura deri më tash në dialogun për normalizimin e marrëdhënieve, përfshirë edhe atë të Asociacionit të komunave me shumicë serbe.