“Qytetarët po përballen me rrezikun e papunësisë masive”.
Kështu ka deklaruar nënkryetarja e PDK-së, Vlora Çitaku pas shkyçjes nga energjia elektrike e bizneseve pas vendimit të Zyrës së Rregullatorit të Energjisë për dalje në treg të lirë të bizneseve.
Me anë të një postimi në Facebook, ajo ka kritikuar Lëvizjen Vetëvendosje për veprimet që i konsideron të qëllimshme, ndaj sektorit privat.
“1400 biznese, kryesisht prodhues, po shkyçen me dhunë nga rrjeti i energjisë elektrike. Mijëra punëtorë rrezikojnë të mbesin pa vende pune, pa të ardhura për veten dhe familjet e tyre. Qytetari i Kosovës, i rraskapitur nga çmimet e larta të produkteve bazike dhe energjisë, sot po përballet edhe me rrezikun e papunësisë masive, si pasojë e vendimeve rrënuese të Kurtit dhe klikës së tij në ZRRE. Situata është alarmante. Ky është vetëm vazhdimi i përpjekjeve të qëllimshme të lidershipit të LVV-së dhe vartësve të tyre për të shkatërruar sektorin privat, ashtu siç kanë bërë me institucionet e pavarura. Kjo mendësi totalitare i përket shekullit të kaluar, dhe shoqëria jonë nuk do ta tolerojë”, ka shkruar ajo.