Nënkryetarja e Partisë Demokratike të Kosovës (PDK), Vlora Çitaku, e ka akuzuar kryeministrin Albin Kurti, duke thënë se po “ndërhyn brutalisht” në zgjedhjet në Maqedoninë e Veriut duke përçarë shqiptarët atje.
Përmes një postimi në Facebook, Çitaku e ka thënë se Kurti ka një mosdurim për secilin lider politik të UÇK-së.
“E çka bën kryeministri dhe Qeveria e Kosovës sot? Ndërhyn brutalisht në zgjedhjet atje, duke përçarë shqiptarët. Duke shpifur e manipuluar. Seç e ka një mosdurim kryeministri Kurti për secilin lider politik të UÇK-së”, ka shkruar Çitaku.
Nënkryetarja e PDK-së ka shtuar se shqiptarët në Maqedoninë e Veriut i kanë dalë hakut Kosovës.
“Shqiptarët në Maqedoninë Veriore i kanë dalë hakut Kosovës. Na i kanë hapur dyert dhe zemrat në orët tona më të vështira. Pa kushte. Për më tepër djem e vajza erdhën dhe me vetëmohim luftuan për lirinë tonë. Disa e dhanë edhe jetën. Dy dekada pas, shqiptarët në Maqedoninë Veriore janë faktorë me peshë. Janë më meritorët për mirëmbajtjen e kursit euroatlantik të vendit të tyre”, ka shkruar tutje ajo.