Kryetarja e Kuvendit të Shqipërisë, Lindita Nikolla, me rastin 23-vjetorit të çlirimit të Kosovës nga Ish-Jugosllavia, ka thënë se çlirimi i Kosovës është vepër e UÇK-së e popullit kosovar, me mbështetjen e aleatëve të mëdhenj, ShBA e NATO.
Ajo ka treguar se, “Shqipëria qëndron në krah të Kosovës, për përballimin e sfidave të përbashkëta, sepse sfidat e Kosovës janë edhe sfidat e Shqipërisë”.
Tutje, Nikolla ka thënë se dita e 23-vjetorit të çlirimit të Kosovës është një ditë që duhet të shënohet edhe për Shqipërinë edhe për të gjithë shqiptarët.
Ajo ka treguar edhe për bashkëpunimin në mes të legjistraturave nga Kosova dhe Shqipëria ku ka thënë, “Kuvendi i Shqipërisë dhe Kuvendi i Kosovës po bashkërendojnë diplomacinë parlamentare për përballimin e tyre”.
Nikolla ka shtuar se, “Anëtarësimi i Kosovës në Këshillin e Evropës është një kërkesë e drejtë dhe e merituar”.
Bombardimet e NATO-s kundër Serbisë nisën më 24 mars 1999 dhe zgjatën 78 ditë.
Pas 78 ditësh të sulmeve, bombardimet u ndërprenë më 10 qershor 1999, me miratimin e Rezolutës 1244 të Këshillit të Sigurimit të Kombeve të Bashkuara (OKB).
Ndërhyrja e NATO-s në Kosovë kishte për qëllim ndalimin e spastrimit etnik ndaj kosovarëve. Pas bombardimeve të NATO-s u mundësua kështu, kthimi i mbi 800 mijë refugjatëve kosovarë në vendlindje.