Ministri i Punëve të Jashtme i Serbisë, Ivica Daçiq, ka thënë se “nuk ka mundësi të negociohet për propozime të reja deri në formimin e Asociacionit të Komunave me shumicë serbe”.
Në takimin tradicional me pjesëmarrësit për Studime të Larta të Sigurisë dhe Mbrojtjes, Daçiq ka thënë se detyra më e vështirë para Serbisë është “ruajtja e sovranitetit dhe integritetit territorial”.
“Falë një politike të mençur, ne kemi formuar një pozitë të qartë dhe të vendosur negociuese, sipas të cilit, nuk mund të ketë negociata për asnjë propozim të ri derisa të mos formohet Asociacioni i Komunave me Shumicë Serbe. E keni të qartë se raundi i ardhshëm i bisedimeve në Bruksel ka një peshë të veçantë, sepse ne duam të mbetemi këmbëngulës në mbrojtjen e interesave tona kombëtare, në radhë të parë për të mbrojtur popullin tonë dhe identitetin kulturor-fetar”, ka thënë Daçiq, raporton “Kosovo Online”.
Daçiq ka theksuar se Serbia ende beson se anëtarësimi i plotë në BE është i arritshëm.
Ndryshe, më 27 shkurt, në Bruksel do të mbahet takim i nivelit të lartë, në kuadër të dialogut Kosovë- Serbi në mes të kryeministrit të Kosovës, Albin Kurti dhe presidentit të Serbisë, Aleksandër Vuçiq.