Për herë të 34-të me radhë, Kuvendi i Kosovës nuk ka arritur të konstituohet.
Edhe këtë të enjte, seanca për formimin e legjislaturës së re ka dështuar, për shkak të mungesës së konsensusit ndërmjet partive politike.
Në rend dite ishte përsëri formimi i komisionit për mbikëqyrjen e votimit të fshehtë për zgjedhjen e kryetarit të Kuvendit – një hap që ka ngecur për shkak të refuzimit të partive opozitare për të marrë pjesë.
Në sallë ishin 102 deputetë, 51 deputetë votuan pro formimit të këtij komisioni, ndërsa një ishte kundër.
Seanca e radhës do të mbahet të shtunën në ora 10:30.
PDK, LDK, AAK dhe Lista Serbe kanë refuzuar të propozojnë anëtarë për komisionin e votimit të fshehtë, duke penguar kështu edhe procesin për kandidaturën e Vetëvendosjes, Albulena Haxhiu.
Kjo e fundit nuk ka siguruar 61 votat e nevojshme në votimin e hapur.
Bllokada politike vazhdon, ndërsa Kosova mbetet pa institucione funksionale, më shumë se dy muaj pas mbajtjes së zgjedhjeve parlamentare.