Dhoma Kombëtare e Avokatisë së Shqipërisë ka reaguar pas incidentit të ndodhur këtë të premte në ambientet e Gjykatës së Vlorës, ku një punonjës sigurie është dhunuar nga një avokat.
Në deklaratë, Dhoma e Avokatisë dënon ashpër ngjarjen dhe konfirmon se në incident është përfshirë avokati R.Ll., anëtar i Dhomës së Avokatisë Vlorë.
“Dhoma e Avokatisë së Shqipërisë dënon incidentin e dhunës në të cilin është përfshirë avokati R.Ll., anëtar i Dhomës së Avokatisë, Vlorë, në ambientet e Gjykatës së Vlorës”, thuhet në reagim.
Institucioni i përfaqësimit të avokatëve thekson se distancohet nga ky akt, duke e cilësuar si të padenjë dhe të pahijshëm për figurën e avokatit.
“Dhoma e Avokatisë së Shqipërisë distancohet nga kjo ngjarje duke e vlerësuar atë të padenjë dhe të pahijshme për figurën e Avokatit. Në të njëjtën kohë ndjejmë keqardhje që ky incident ka ndodhur në ditën e bojkotit të vendosur nga DHASH, pikërisht për të ndalur fenomenin e dhunës ndaj funksionarëve dhe punonjësve në sistemin e drejtësisë, nisur nga vrasja e gjyqtarit Astrit Kalaja.”
Në reagim, DHASH njofton se po ndjek me shqetësim dhe seriozitet rastin dhe se do të ndërmarrë të gjitha masat e nevojshme për trajtimin e tij.
“DHASH njofton të gjithë avokatët dhe opinionin publik se po e ndjek me shqetësim dhe seriozitet këtë ngjarje dhe do të ndërmarrë të gjitha masat e nevojshme për të trajtuar rastin e këtij avokati. Në të njëjtën kohë, inkurajojmë institucionet përkatëse të hetojnë dhe të zbardhin këtë incident të shëmtuar”, thuhet më tej në reagim.