Njësitet e Doganës së Kosovës kanë arritur të parandalojnë futjen e 30 mijë eurove në formë ilegale. Në njoftimin e tyre thuhet se në pikëkalimin kufitar të Vërmicës është paraqitur një automjet me targa të Shqipërisë, i drejtuar nga një shtetas shqiptar, i cili kishte thënë se nuk ka asgjë për të deklaruar brenda veturës së tij.
Pas ekzaminimit fizik të automjetit, atij i janë gjetur afër 30 mijë euro të padeklaruara.
“Automjeti është ndaluar për kontroll dhe në pyetjen se a keni diçka të deklaroni, vozitësi ka deklaruar se nuk posedon asgjë. Automjeti është dërguar në vijën e dytë të kontrollit së bashku me policin është bërë ekzaminimit fizik i automjetit. Gjatë kontrollit janë gjetur mjete monetare në vlerë prej 28650.00 euro të pa-deklaruara. Mjetet monetare ishin të vendosura në çantën e brezit si dhe ne çantën e Lap Top-it te ndara në katër paketime”, thuhet në njoftim.
Rasti më tutje ka vazhduar për hetime, derisa është bërë e ditur se është konfiskuar sasia e mjeteve monetare konform procedurave ligjore.