Dogana e Kosovës ka konfiskuar 80 mijë copë cigare pa banderola, të kontrabanduara nga Serbia drejt Kosovës, të cilat ishin fshehur në një autobus që qarkullonte në linjën Serbi–Kosovë.
Rasti ka ndodhur mbrëmjen e së dielës, kur njësitet Antikontrabandë të Doganës, në bashkëpunim me Policinë e Kosovës, kanë ndaluar për kontroll dy autobusë në qytetin e Mitrovicës.
Gjatë kontrollit fillestar të njërit prej autobusëve, për shkak të kushteve të kufizuara për inspektim të plotë, zyrtarët doganorë kanë zbuluar një sasi të konsiderueshme cigareve pa banderola të fshehura në sistemin e ajrosjes.
Kontrollet e detajuara më pas zbuluan edhe një “bunker” të posaçëm për fshehjen e mallrave, si dhe cigare të tjera të fshehura në tualetin e autobusit.
Sipas Doganës, këto cigare dyshohet se ishin destinuar për tregun e brendshëm të Kosovës, në kundërshtim me ligjin.
Rasti është proceduar për hetime të mëtejshme në bashkëpunim me Prokurorinë Themelore.