Ikona e muzikës country, Dolly Parton, ka njoftuar se disa nga koncertet e saj të planifikuara në Las Vegas do të shtyhen, pasi po përballet me probleme shëndetësore që kërkojnë trajtim mjekësor. Lajmin e bëri të ditur vetë këngëtarja 79-vjeçare përmes një postimi në rrjetet sociale.
“Fatkeqësisht, do të më duhet të shtyj koncertet e mia në Las Vegas. Kam disa probleme shëndetësore dhe mjekët më kanë këshilluar të kryej disa procedura”, shkroi Parton, duke theksuar me humor se nuk do të ishte në gjendje të përgatiste një performancë të denjë për publikun.
“Ju meritoni më të mirën, dhe dua të jem në formën time më të mirë kur të ngjitem në skenë”, shtoi ajo.
Koncertet, të cilat ishin parashikuar për dhjetor 2025 në The Colosseum, Caesars Palace, do të zhvendosen për në vjeshtën e vitit 2026. Ky do të ishte angazhimi i parë afatgjatë i Parton në Las Vegas pas 32 vitesh.
Organizatorët njoftuan se biletat ekzistuese do të mbeten të vlefshme për datat e reja, ndërsa do të ofrohen edhe rimbursime për ata që e kërkojnë.
Ndërkohë, në nëntor të këtij viti, Dolly Parton do të nderohet me Çmimin Humanitarian Jean Hersholt – një Oscar nderi – për kontributin e saj të vazhdueshëm në fushën e bamirësisë.