Dy aksidente me fatalitet kanë ndodhur të mërkurën e 26 qershorit.
Një grua ka humbur jetën në një aksident trafiku në rrugën magjistrale Ferizaj-Gjilan, që ndodhi rreth orës 17:00.
Aksidenti ka ndodhur në rrugën Sojevë e Ferizajt, ku janë përfshirë një kamion transportues dhe një veturë, ku ka mbetur edhe një person i lënduar.
Vdekja e gruas është konfirmuar nga mjekët kujdestarë në vendin e ngjarjes, e i lënduari po trajtohet në Qendrën Emergjente në Ferizaj.
“I dyshuari mashkull kosovar derisa ishte duke e drejtuar automjetin e tij dyshohet se nga pakujdesia e godet një kamion, ku përveç dëmeve materiale lëndime trupore pësojnë i dyshuari dhe viktima femër kosovare/pasagjere e cila nga lëndimet e marra ndërron jetë në vendin e ngjarjes. Vdekjen e viktimës e ka konstatuar mjeku kujdestar, kurse i dyshuari është dërguar për tretman mjekësor. Me vendim të prokurorit, trupi i pajetë dërgohet në IML për obduksion”, thuhet në raportin e PK-së.
Ndërsa në Viti një person ka humbur jetën, pasi me motoçikletën e tij ka përfunduar jashtë rrugës.
Sipas raportit 24-orësh, dyshohet se viktima duke mos iu përshtatur shpejtësisë së lëvizjes, humb kontrollin mbi motoçikletën dhe godet një veturë dhe përfundon jashtë rrugës.
Mjeku kujdestar konstatoi vdekjen e tij, teksa trupi i pajetë u dërgua në IML për obduksion.
“I dyshuari mashkull kosovar derisa ishte duke e drejtuar motoçikletën e tij, dyshohet se duke mos iu përshtatur shpejtësisë së lëvizjes, humb kontrollin mbi motoçikletën dhe godet një veturë dhe përfundon jashtë rrugës. I njëjti pëson lëndim të rënda dhe dërgohet për trajtim mjekësor ku mjeku kujdestar konstaton vdekjen e tij. Me vendim të prokurorit trupi i pajetë dërgohet në IML për obduksion”, thuhet në raportin e PK-së.