Prokuroria Speciale e Kosovës ka dhënë detaje lidhur me arrestimin e Fatmir Shehollit, i dyshuar për përfshije në spiunazh.
Në njoftimin e Prokurorisë bëhet e ditur se Sheholli është arrestuar me asistencën e Agjencisë së Kosovës për Inteligjencë teksa i njëjti tash e disa muaj ishte nën hetime, njofton Dukagjini.
“Pas zhvillimit hetimeve disa mujore, me urdhër të Prokurorisë Speciale të Kosovës, të enjten hetuesit policorë nga Drejtoria për Hetimin e Krimit të Organizuar dhe Krimeve të Rënda në Policinë e Kosovës kanë arrestuar F.SH., nën dyshimet për veprën penale “Spiunazh”. I dyshuari F.SH., është arrestuar në regjionin e Prishtinës, nën dyshimin e bazuar se ka kryer veprën penale “Spiunazh”, nga neni 124 paragrafi 3 të KPRK-së. Operacioni i arrestimit është kryer edhe me asistencë të Agjencisë së Kosovës për Inteligjencë”.
Fatmir Sheholli me urdhër të prokurorit është ndaluar për 48 orë teksa hetimet janë duke vazhduar.
“Me aktvendim të Prokurorisë Speciale, i dyshuari është ndaluar për 48 orë, dhe nga njësitet relevante të Policisë së Kosovës janë duke u kryer bastisje në vendbanimin e të dyshuarit, me qëllim të sigurimit edhe të provave të tjera materiale. Prokuroria Speciale e Kosovës, në bashkëpunim dhe koordnim me Policinë e Kosovës, është duke ndërmarrë të gjitha veprimet e nevojshme hetimore, në përputhje me Kodin e Procedurës Penale dhe ligjet në fuqi, për të cilat publiku do të njoftohet në kohë”, thuhet në njoftimin e Prokurorisë.
Arrestohet Fatmir Sheholli nën dyshimin për përfshirje në spiunazh