Qeveria e Kosovës, në mbledhjen që do ta mbajë sot, pritet të marrë vendim për ndalimin e përdorimit të platformës sociale TikTok në të gjitha institucionet publike.
Në lidhje me këtë, eksperti i sigurisë kibernetike, Mentor Hoxha, ka thënë se duhet të ndalohet instalimi i këtij aplikacioni dhe jo vetëm të ndalohet përdorimi apo funksionimi.
Në emisionin “Rreth e Rrotull” në RTV Dukagjini, Hoxha ka thënë se qeveria do të duhej të ndërmerrte vendimin për ndalimin e instalimit të këtij aplikacioni në të gjitha pajisjet teknologjike informative dhe jo vetëm në institucionet publike.
“Qeveria e Kosovës nuk mund të marrë asnjë vendim për funksionimin e TikTok-ut, nuk e di si mendojnë ta realizojnë. Qeveria do duhej të ndërmerrte vendimin për ndalimin e instalimit të këtij aplikacioni në të gjitha pajisjet teknologjike informative. Vendimi do duhej të ishte që të ndalohej instalimi i aplikacionit, jo të ndalohej funksionimi, është nonsense”, ka deklaruar Hoxha.
Në anën tjetër, Ardian Arifaj nga Agjencia për Informim dhe Privatësi (AIP) ka thënë se këtë praktikë e kanë ndjekur të gjitha vendet evropiane dhe më shumë ka të bëjë me mbrojtjen e sigurisë kombëtare sesa të të dhënave personale.
“Këtë praktikë e kanë ndjekur vendet evropiane, kjo nuk do të thotë se qeveritë ose qeveria jonë ka të bëjë me mbrojtjen e sigurisë kombëtare sesa të dhënave personale. Është ndjekur praktikë e vendeve evropiane, për shkak se nuk kanë një informacion të saktë ku ruhen këto të dhëna. Ka informacione që shpesh që TikTok-un e lidhin me qeverinë e Kinës”, ka deklaruar Arifaj.
Ai thotë se si Agjenci mbajnë kontakte me TikTok-un në lidhje me politikat e privatësisë.
“Kemi vendosur kontakte me TikTok-un, kemi obliguar të respektojë disa parime që i parasheh ligji jonë, ata fillimisht në kuadër të parimit të transparencës kanë publikuar politikat e privatësisë në gjuhën shqipe”, ka vijuar ai.
Arifaj ka theksuar se qëllimi për marrjen e këtij vendimi nga qeveria do të jetë që pajisjet që janë në përdorim nga institucionet publike nuk kanë të drejtë të përdorin TikTok-un lidhur me promovimin e aktiviteteve.
Ndryshe, Qeveria e Kosovës në mbledhjen që do ta mbajë sot, pritet të marrë vendim për ndalimin e përdorimit të platformës sociale TikTok në të gjithë institucionet publike.
“Shqyrtimi i propozim vendimit për ndalimin e funksionimit të shërbimeve të rrjetit social TikTok në të gjitha institucionet e Republikës së Kosovës”, thuhet në pikën e pestë të rendit të ditës të mbledhje së Qeverisë e cila pritet të mbahet sot në orën 14:00.