Përfaqësuesi Special i Shteteve të Bashkuara të Amerikës për Ballkanin Perëndimor, Gabriel Escobar dhe i dërguari i posaçëm i Bashkimit Evropian për dialogun Kosovë-Serbi, Miroslav Lajçak, tashmë kanë arritur në presidencën e Kosovës, ku janë pritur nga presidentja Vjosa Osmani.
Ndonëse ka mbetur edhe një javë kohë deri më një shtator, kur Qeveria e Kosovës do të nisë zbatimin e vendimeve për riregjistrim të automjeteve me targa serbe në RKS dhe lëshimin e dokumenteve hyrëse-dalëse për shtetasit serbë, tashmë veçse kanë filluar vizitat ndërkombëtare në Kosovë në përpjekje për të gjetur një zgjidhje.
Qëllim i vizitës së dy emisarëve është që të bisedojnë me palët për arritjen e një marrëveshjeje të mundshme, përpara një shtatorit.
Escobar dhe Lajçak, pas takimit me presidenten Osmani, në orën 15:00 do të takohen edhe me kryeministrin Albin Kurti dhe zëvendëskryeministrin Besnik Bislimi.
Dyshja do të takohet edhe me liderët e partive opozitare në orën 16:00.
Pas këtyre takimeve, të enjten dy emisarët pritet të vizitojnë edhe pjesën veriore të vendit.