Portieri 20-vjeçar, Eurolind Avdimetaj, po vazhdon të jetë një nga zbulimet më të mëdha të këtij sezoni në Ligën e Parë. Me paraqitje të jashtëzakonshme kundër Trepçës, Lirisë dhe Vëllaznimit, ai ka dëshmuar se është një ndër portierët më të sigurt në kampionat.
Me reflekse të shpejta dhe vendosmëri të palëkundur, Avdimetaj është shndërruar në shtyllën e fundit të mbrojtjes së Suharekës, duke fituar besimin e trajnerëve dhe tifozëve. Gjatë këtij sezoni ai ka qenë në portë në 18 ndeshje, ndërsa fiziku i tij imponues prej 1.97 metrash e bën edhe më të vështirë për kundërshtarët të gjejnë rrugën drejt rrjetës.
Formën e tij të lartë tashmë e kanë vënë re disa skuadra të Superligës së Kosovës, por edhe të Kategorisë Superiore në Shqipëri, të cilat po shprehin interes serioz për talentin e ri suharekas.
Avdimetaj po rritet me ritme të shpejta dhe, me këtë progres, pritet të bëhet një prej emrave më të rëndësishëm të portierëve shqiptarë në vitet e ardhshme.