Si shpeshherë, në emisionin “Pasdita Sportive” në Radio Dukagjini, edhe këtë të dielë ishte i ftuar një fans i flaktë i sportit të futbollit.
Kësaj radhe në “Pasdita Sportive” me Ndrec Gjonaj dhe Ardit Lipa ishte i ftuar fansi i flaktë i skuadrës italiane Roma, Shqipdon Govori, i cili e përkrah këtë skuadër që nga sezoni 2001/2002.
Si shumë fansa të klubit nga kryeqyteti italian në epokën moderne, arsyeja e lindjes së një dashurie ndaj këtij klubi për Govorin ishte legjenda italiane, Francesco Totti.
Besnikun e Romës, Tottin, Govori e kishte pasur rastin ta takonte në finalen e kaluar të Konferencë Ligës që ishte zhvilluar në Tiranë, e të cilën e kishte fituar Roma.
Govori është edhe iniciatori i Fan Klubit të Romës në Kosovë, ku ka mbledhur tifozë të kësaj skuadre në këtë grup, e sipas tij, shpeshherë i përcjellin bashkë ndeshjet, e madje edhe luajnë futboll.
Edhe pse fans i flaktë i Gjallorosëve, Govori e pranon që Roma nuk është një skuadër e trofeshme, mirëpo sipas tij nga ky vit do të fillojë fitimi i më shumë trofeve për këtë klub.
Ai beson se këtë sezon Roma do të shpallet fituese e ligës italiane, Serie A, teksa edhe pse rival kryesor këtë sezon e cilëson Milanin, në radhitjen e parashikuar të tij për top 4-shen e Serie A, pas Romës ka vendosur Interin, Milanin dhe në fund Juventusin.