Drejtori i Institutit të Sigurisë “Octopus”, Arben Fetoshi, ka reaguar pas paradës ushtarake të mbajtur në Beograd, duke e cilësuar atë si një zgjatim të provokimeve ruse dhe jo një shfaqje ceremoniale të zakonshme.
Në një postim, Fetoshi tha se pas kësaj parade fshihet frika dhe kriza e regjimit të Aleksandar Vuçiqit, duke përmendur se për më shumë se dhjetë ditë tanket kanë qenë në rrugët e Beogradit dhe se protestuesit janë penguar nga policia për të mos shprehur kundërshtimin e tyre.
“Një tjetër frikësim në stilin stalinist, më tha një mik nga Beogradi, duke shtuar se shpresa është që kjo politikë armiqësore të shembet sa më parë”, shkroi Fetoshi.
Ai e lidhi këtë paradë me një seri manifestimesh të mëparshme në Pekin dhe Moskë, të cilat sipas tij, Vuçiq i përdor për të treguar “epërsinë” rajonale, për të ushqyer nacionalizmin dhe për të fituar mbështetje me propagandë e manipulim.
“Militarizimi i Serbisë nuk është neutralitet apo modernizim, por pjesë e një komunikimi strategjik që ka për qëllim imponimin e fuqisë ushtarake si instrument i politikës revizioniste dhe ekspansioniste,” theksoi Fetoshi.
Drejtori i “Octopus” paralajmëroi se Serbia, duke u armatosur njëkohësisht me sisteme franceze, ruse dhe kineze, po pozicionohet si fuqia më e madhe ushtarake në Ballkanin Perëndimor, në funksion të projektit të saj për “Botën Serbe”.
Ai shtoi se parada e sotme duhet të shihet si sinjal alarmi për Kosovën dhe për partnerët euro-atlantikë të rajonit.
“Demaskimi i paradës në Beograd si zgjatim i provokimeve ruse kundër NATO-s dhe rendit euro-atlantik nuk është thjesht retorikë, por sinjalizim për planet kërcënuese kundër Kosovës dhe arkitekturës së sigurisë rajonale”, përfundoi Fetoshi.
Agim Musliu: Parada e Beogradit, fasadë që fsheh krizën e regjimit Vuçiq