Filmi i fundit i Leonardo DiCaprio-s, One Battle After Another, po udhëheq sezonin e çmimeve në Hollywood, pasi mori nëntë nominime për çmimet Golden Globe 2026..
Ky film, që tregon historinë e rrëmbimit të vajzës së një ish-revolucionari, është nominuar për filmin më të mirë në kategorinë komedi/muzikal. DiCaprio dhe aktorët Sean Penn, Teyana Taylor, Benicio Del Toro dhe Chase Infiniti, janë gjithashtu të nominuar në kategoritë e aktrimit.
Drama familjare me shumë gjuhë, Sentimental Value, është pasuesi më i afërt me tetë nominime, ndërsa nominimet e tjera të aktrimit përfshijnë Dwayne Johnson, Timothée Chalamet dhe aktoret Cynthia Erivo dhe Ariana Grande për Wicked: For Good.
Megjithatë, vazhdimi i Wicked nuk arriti të marrë nominim për filmin më të mirë, pavarësisht suksesit në box office.
Fituesit e Golden Globe do të zbulohen gjatë ceremonisë që mbahet në Los Angeles më 11 janar, një datë kyçe në përgatitjet për Oscars që zhvillohen në mars.
Të nominuarit e tjerë të spikatur përfshijnë: adaptimin e romanit të Maggie O’Farrell, Hamnet, dramën vampirike Sinners, dhe filmin Frankenstein të Guillermo del Toro. Yjet irlandeze Paul Mescal dhe Jessie Buckley janë vlerësuar në kategoritë e aktrimit për rolet e tyre në Hamnet.
Timothee Chalamet është nominuar për portretizimin e lojtarit të ping-pongut, Marty Mauser, në biografinë sportive Marty Supreme. George Clooney mori nominimin e tij të 14-të Golden Globe për rolin kryesor në filmin Jay Kelly të Noah Baumbach, që tregon jetën e një aktori të plakur hollywood-ian, ndërsa bashkëlojtari i tij Adam Sandler është nominuar si aktor dytësor.
Emma Stone është nominuar për rolin e saj në komedinë e zezë Bugonia, që gjithashtu ka tre nominime, përfshirë bashkëlojtarin Jesse Plemons.
Ky vit është i fortë për filmat ndërkombëtarë. Përveç Sentimental Value nga Norvegjia, mbështetje ka marrë edhe filmi iranian It Was Just An Accident i regjisor Jafar Panahi, që rrëfen historinë e një burri që kërkon hakmarrje ndaj ish-agjentit të inteligjencës që e torturoi në burg.
Ky film ka katër nominime, ndërsa filmat e tjerë ndërkombëtarë The Secret Agent dhe No Other Choice kanë nga tre nominime secili.
Filmat kryesorë dhe numri i nominimeve:
- One Battle After Another – 9
- Sentimental Value – 8
- Sinners – 7
- Hamnet – 6
- Frankenstein – 5
- Wicked: For Good – 5
- It Was Just an Accident – 4