Ish-zëvendësministri i Punëve të Jashtme të Kosovës, Anton Berisha, ka folur lidhur me temën se kush është duke e mbrojtur më shumë Ushtrinë Çlirimtare të Kosovës(UÇK), ku ka thënë se raporti i Dick Marty-t e kishte përfshirë dhe vetë Shqipërinë për shkak të Shtëpisë së Verdhë, ku akuzohej për trafikim organesh.
Sipas Berishës, reagimi i Kryeministrit të Shqipërisë, Edi Rama kishte bazë sepse në akuza bëhej fjalë për përfshirjen e Republikës së Shqipërisë.
Ai ka vazhduar t’i sqarojë disa dimensione pse Kryeministri i Shqipërisë, Rama kishte reaguar në lidhje me këtë temë ku ka thënë se “për vetë faktin që është përfshirë shteti i tij, është normale që të reagojë”.
Tutje ai ka shtuar se është e dijshme se dy shtete Kosova dhe Shqipëria, përbëhen nga një komb i njëjtë që është lidhje e fortë për çka nuk duhet të jemi inferiorë.
“Shqipëria dhe Kosova përbëhen nga një popullatë e njëjtë”, ka shtuar ai.
Ndërsa dimensioni i fundit për Berishën është se mund të jetë se Rama këtë është duke bërë nga vullneti i mirë i tij që ta përmirësojë imazhin e Kosovës pasi, “qëndrimet e Edi Ramës për UÇK-në janë të njohura”.
Për të raporti i Dick Marty-t është në dëm të gjithë kombit shqiptar e jo vetëm për Ushtrinë Çlirimtare të Kosovës.
Ai ka përfunduar duke pyetur se a është duke e bërë Rama këtë në konsultim me shtetet e tjera apo është vetëm një iniciativë e tij?