(E përditësuar) Njësitë e specializuara të zhytjes dhe kërkim-shpëtimit të Forcës së Sigurisë së Kosovës (FSK) janë angazhuar që nga mëngjesi i sotëm në operacionin për gjetjen e trupit të mërgimtarit, i cili dyshohet se u mbyt të dielën në Liqenin e Ujmanit, në Komunën e Zubin Potokut.
Lajmin e ka bërë të ditur ministri në detyrë i Mbrojtjes, Ejup Maqedonci, përmes një postimi në Facebook.
“FSK, në kuadër të detyrave të saj thelbësore, ofron mbështetje për autoritetet civile. Në këtë rast, në bashkëpunim me Agjencinë për Menaxhimin e Emergjencave, Policinë e Kosovës dhe në koordinim me KFOR-in, ekipet tona të specializuara kanë filluar operacionin e kërkimit në Liqenin e Ujmanit me qëllim që sa më shpejt të gjendet dhe të nxirret trupi i të ndjerit,” ka shkruar Maqedonci.
Siç raporton gazetarja në terren e TV Dukagjinit, Dea Dedinca, ekipet e FSK-së po operojnë në ndërrime, ku një grup zhytësish ka dalë nga uji dhe u zëvendësua menjëherë nga një tjetër, për të mundësuar kërkim të pandërprerë në thellësitë e liqenit.
Kërkimet për 33-vjeçarin që u zhduk të dielën, pasi u hodh në liqen dhe nuk doli më në sipërfaqe, po vazhdojnë tash e tri ditë.
Deri më tani, përkundër angazhimit të shumë ekipeve, trupi i tij nuk është gjetur.
