Forcat e Sigurisë së Kosovës kanë gjetur trupin e pajetë të një personi të zhdukur, pasditen e së mërkurës në Liqenin e Badovcit.
Me anë të një postimi në Facebook, FSK ka bërë të ditur se në bashkëpunim me Policinë e Kosovës, trupi është gjetur pas disa orësh kërkimi.
“Pas ftesës së Qendrës së Situatave të Qeverisë së Republikës së Kosovës, për angazhimin e Ekipeve të FSK-së, për operacionin e kërkim shpëtimit malor dhe K9 të Gardës Kombëtare të FSK-së. FSK ka marr të gjitha masat dhe ka angazhuar ekipet në Operacion e kërkimit të personit të zhdukur me inicialet G.G, dhe ka arritur që pas disa orësh kërkimi në bashkëpunim me Policinë e Kosovës, të gjejnë trupin e pajetë në zonën e liqenit të Badovcit”, thuhet në njoftim.
Krahas kësaj, bëhet e ditur se pas evakuimit të viktimës, trupi i pajetë i është dorëzuar Policisë së Kosovës dhe ekipit të forenzikës për procedurat e mëtejme.
Një person është gjetur i vdekur në Liqenin e Badovcit, të mërkurën e 19 prillit.
Ai ishte raportuar nga familjarët si i zhdukur më 17 prill.
Ekipi mjekësor në vendngjarje ka konstatuar vdekjen e viktimës.
Kështu ka thënë për Portalin Dukagjini, zëdhënësja e Policisë për Rajonin e Prishtinës, Flora Ahmeti.
“Sot rreth orës 11:30, nga ekipi i kërkimit i përbërë nga njësite policore dhe të FSK-së, në liqenin e Badovcit është gjetur një trup i pajetë. Ekipi mjekësor në vendngjarje ka konstatuar vdekjen e viktimës. Bazuar në të dhënat fillestare dyshohet se bëhet fjalë për personin mashkull G.G., i cili nga familjarët është raportuar i zhdukur më datën 17 prill 2023, në stacionin e Lipjanit”, është shprehur Ahmeti.