Një gazetar rus i nderuar me Çmimin Nobel për Paqen, ka shitur medaljen e tij për 97 milionë euro – dhe ua ka dhuruar paratë fëmijëve refugjatë ukrainas.
Dmitry Muratov, redaktor i gazetës ruse “Novaya Gazeta” që kritikonte ashpër Kremlinin dhe koleges së tij Maria Ressa nga Filipinet, iu dha Çmimi Nobel për Paqe vitin e kaluar.
Por të hënën – në Ditën Botërore të Refugjatëve – medalja e tij doli në ankand dhe arriti shumën marramendëse.
Ideja e donacionit, tha ai, “është t’u japë fëmijëve refugjatë një shans për një të ardhme”.
Ai shtoi se ishte e rëndësishme se sanksionet ndërkombëtare të vendosura kundër Rusisë nuk pengojnë ndihmat humanitare, të tilla si ilaçet për sëmundje të rralla dhe transplantet e palcës së eshtrave, që të arrijnë tek ata në nevojë.
Më parë, medalja e çmimit Nobel më e paguar ndonjëherë ishte 4.76 milionë dollarë (4.6 milionë euro) në 2014. Kjo ishte medalja e James Watson, i cili e mori këtë çmim nga bashkëzbulimi i strukturës së ADN-së në vitin 1962, njofton SkyNews.