Zëvendëskryeministrja e Kosovës dhe njëherësh ministrja e Punëve të Jashtme, Donika Gërvalla, ka folur për procesin e liberalizimit të vizave për Republikën e Kosovës ku pritet të dalë në diskutimi në Këshillin e Evropian nga Republika Çeke, e cila mban kryesinë e radhës të Bashkimit Evropian.
Ajo në pyetje e mediumit Zëri i Amerikës, se a është optimiste se BE-ja mund të marrë vendim për liberalizimin e vizave për Kosovën, ka thënë se nuk ka arsye për t’u mohuar liberalizimin e vizave për qytetarët e Republikës së Kosovës. Gërvalla ka shtuar se për këtë çështje kanë punuar në baza ditore.
Sipas saj, mosliberalizimi i vizave “është padrejtësi e madhe që qytetarët e Republikës së Kosovës janë të vetmit në rajonin tonë, të cilët nuk mund të lëvizin pa aplikuar për viza dhe procesi i aplikimit për viza është jashtëzakonisht i gjatë, i shtrenjtë dhe i komplikuar”.
“Prandaj, përderisa është konstatuar disa herë që Kosova i ka përmbushur, madje më shumë sesa që ka qenë e kërkuar, kriteret për liberalizim vizash, është në fakt në pyetje kredibilitet i Bashkimit Evropian më shumë sesa që përgjegjësia bie në anën tonë”, ka shtuar Gërvalla.
Ajo ka përfunduar duke thënë se është optimiste se më datën 13 tetor do të liberalizohen vizat, por ajo ka thënë se nuk dëshiron të hapë shampanjë e tani të mos liberalizohen vizat raporton Zëri i Amerikës, transmeton Portali Dukagjini.