Të shtunën e 5 nëntorit shënohet gjashtëvjetori i vdekjes së aktivistit të Lëvizjes Vetëvendosje, Astrit Dehari.
Anëtarët e Lëvizjes Vetëvendosje kanë planifikuar të bëjnë homazhe te varri i Astrit Deharit, duke filluar nga ora 09:30.
Më pas, në orën 11:00 parashihet të dhurohet gjak.
Për këtë përvjetor të Astrit Deharit, do të mbahen edhe dy diskutime, njëra në orën 14:00, në Prishtinë, “Përjetimet me Astritin si aktivist i Lëvizjes, student, shok e familjar i përkushtuar”, që mbahet në Hollin e Biblotekës Kombëtare. Ndërsa “Aktiviteti i Astrit Deharit në qendrën e Pejës, përvojat e bashkëpunëtorëve dhe aktivistëve me të”, mbahet në orën 17:00, në zyrën e Lëvizjes Vetëvendosje në komunën e Pejës.
Astrit Dehari ishte arrestuar bashkë me pesë aktivistë të tjerë të Lëvizjes Vetëvendosje, si i dyshuar për sulm terrorist në Kuvendin e Kosovës.
Ishte mesnata e pesë gushtit të vitit 2016, kur një raketëhedhës dore goditi ndërtesën e Parlamentit, ndërkaq ngjarja u cilësua si akt terrorist.
Më pas, direktiva e Prokurorisë Speciale, Drejtoria antiterror e policisë, ka nisur hetimet për zbardhjen e rastit.
Kësisoj, 25 ditë pas sulmit mbi Kuvendin, Drejtoria kundër Terrorizmit në Policinë e Kosovës, ka nisur operacionin dhe ka arritur të arrestojë gjashtë aktivistë të Vetëvendosjes.
Për këtë rast, në pranga kanë përfunduar Frashër Krasniqi, Petrit Ademi, Adea Batusha, Atdhe Arifi e Egzon Haliti.
Në mesin e të arrestuarve ka qenë edhe Astrit Dehari.
Gjykata ka vendosur që personat të përfundojnë në paraburgim, me përjashtim të Petrit Ademit, pasi çështja e tij u mbyll.
Dehari ishte dërguar në qendrën e Paraburgimit në Prizren.