Ish-luftëtari i Ushtrisë Çlirimtare të Kosovës (UÇK), Dritan Goxhaj, është liruar nga burgu, pasi Gjykata e Apelit në Tiranë ka rrëzuar vendimin e Gjykatës së Shkallës Parë.
Ky vendim ka përfshirë edhe refuzimin e kërkesës për ekstradimin e Goxhajt, bëjnë të ditura burime të EuroNews.
Dritan Goxhaj u arrestua më 31 korrik 2023 me urdhërarrest të lëshuar nga Gjykata Speciale e Kosovës, me qëllim ekstradimin e tij në Hagë.
Ai u akuzua për nxjerrjen e emrave të dëshmitarëve në disa çështje të hapura më parë nga Prokuroria Speciale e Kosovës.
Gjithashtu, Goxhaj u akuzua për veprat penale të pengimit të punës së zyrtarëve dhe të frikësimit të dëshmitarëve sipas Kodit Penal të Republikës së Kosovës.
“Në përfundim të gjykimit në apel, sot më datë 10.10.2023, Gjykata e Apelit të Juridiksionit të Përgjithshëm, e përbërë nga trupi gjykues me Gjyqtar z. Genti Shala, vendosi:
Ndryshimin e vendimit Nr. 1204 Akti, datë 19.09.2023, të Gjykatës së Shkallës së Parë të Juridiksionit të Përgjithshëm Tiranë.
Rrezimin e kërkesës për ekstradimin e shtetasit D.G nga Republika e Shqipërisë në Republikën e Kosovës.
Heqjen e masës së sigurimit “arrest në burg” për shtetasin D.G, caktuar me vendimin Nr. 1123 Akti, datë 20.07.2023 të Gjykatës së Shkallës së Parë të Juridiksionit të Përgjithshëm Tiranë”, thuhet në njoftim.
Gjithashtu, në fund të njoftimit thuhet se urdhërohet lirimi i Goxhajt, nëse nuk mbahet për ndonjë vepër tjetër penale.