Policia e Kosovës ka arrestuar katër persona të dyshuar për një grabitje që ka ndodhur në orët e para të mëngjesit të së premtes në Fushë Kosovë.
Sipas raportit 24-orësh të Policisë, rasti ka ndodhur rreth orës 01:03, në rrugën “Nëna Terezë”.
Të dyshuarit, të gjithë meshkuj kosovarë, dyshohet se e kanë sulmuar një qytetar duke i hedhur sprej dhe më pas i kanë grabitur çantën e krahut, në të cilën gjendeshin 8 mijë euro.
Pas identifikimit dhe arrestimit, katër të dyshuarit janë intervistuar në stacionin policor. Me vendim të prokurorit, ata janë dërguar në mbajtje për procedura të mëtejshme hetimore.
Policia po vazhdon hetimet për zbardhjen e plotë të rastit.